Salta la barra di navigazione e vai ai contenuti
Vivere la campagna
Agricoltura
Ambiente
Bilancio e Patrimonio
Consigliera di Parità
Cultura
Formazione Professionale
Immigrazione/Emigrazione
Innovazione Tecnologica
Lavori pubblici e Viabilità
Lavoro
Personale
Pianificazione Territoriale
Politiche giovanili
Politiche Sociali
Protezione civile
Pubblica Istruzione
Sport
SUAP
Trasporti
Turismo
URP
Friday, November 23, 2012 - COMUNE DI GUSPINI
cenàbara 23 de Donniasantu de su 2012 – Comunu de Gùspini
Arriciu, pubbricaus : In Gùspini puru sa citadinàntzia onorària a is pipius de babbus e mammas istràngius.
Fonti : Comunu de Gùspini
Cussa de custu mengianu est istétia una dì importanti po Gùspini, su Consillu Comunali, difatis, s’est reuniu de primu mengianu, po cambiai sa delíbbera de su Consillu Comunali n° 53 de su 9 de Donniasantu de su 2012, cumpletendi s’art. 9 de s’Istatutu Comunali asuba de sa citadinàntzia onorària, aprovendi su regulamentu relativu. A sa serrada de su Consillu, ant donau sa citadinàntzia onorària a is primu tres pipius nàscius in Italia ma de babbu e mamma istrangius e residentis in Gùspini. Su Síndigu Rossella Pinna, arricit a is citadinus nous cun custu fueddus: “Po nosu, Nenè, Farez e Juri chi tenint oríginis e istórias diferentis de sa nostra, unu cabori de peddi cussu puru diferenti, chi in domu chistionant arabu o senegalesu ma italianu e sardu puru funt fillus nostrus e impari a is àterus fillus nostrus ci ant a agiudai a costruiri unu grandu benidori” .
Unu passu importanti po sa comunidadi guspinesa ma puru unu sinnali forti, po domandai a livellu natzionali sa modífica de sa lei atuali. Custa bidea est esprimia de su Consillu Comunali e de su Presidenti provinciali de sa “UNICEF”, Rosella Onnis, presenti a cust’atóbiu importanti, chi at sutalineau, cumenti de parispassu a sa fortuna manna de is pipius de Gùspini ddoi at sa preséntzia in Italia de is migliajas de pipius prus isfortunaus, chi chentza de is babbus e de is mammas a garantzia de s’istadu insoru, po s’Istadu no esistint e, in manera uficiali giai sparessius, si agatant in situatzionis de perígulu cumenti a s’isfrutamentu, a sa violéntzia a s’atzitzamentu a s’illegalidadi. A acumpangiai is citadinus guspinesus nous, a parti is babbus e is mammas, ddoi iat is cumpàngius de iscola, is amigus e is parentis, chi ant prenu s’aula de su Consillu Comunali, po sa cirimónia de intregadura de sa pergamena de citadinu onoràriu impari a una cucarda tricolori e de una còpia de sa Costitutzioni Italiana.
Cussa de Gùspini est una proposta chi si afiancat a cussas chi funt bessendi in medas comunus d’Italia. S’auguriu, torrau a fai, de su Síndigu de Gùspini, chi at chistionau a nómini de totu su Consillu, est chi custus signalis bessant de una certa importàntzia po podi modificai de pressi sa lei, in modu de podi garantiri a totus is chi nascint in Italia s’arreconnoscimentu de citadinàntziaitaliana in basi a su “Ius Soli”, poita immui sa citadinàntzia si podit pigai in basi a su “Ius sanguinis”, est a nai chi pigat sa cittadinàntzia si su babbu o sa mamma dda tenit giai). Su “Ius Sanguinis” ( in su modellu tedescu puru) presuponit una cuncetzioni “ogetiva” de sa citadinàntzia e si basat asuba de su sanguni, asuba de s’arratza, de sa língua e asuba de sa civilidadi comuna. Su “ Ius Soli”, invecias cumportat s’acuistu de sa citadinàntzia po totus cussus chi nascint in d-una natzioni, connotu puru cumenti a modellu francesu, chi si basat asuba de una cuncetzioni “sugetiva” de sa citadinàntzia.
Su percursu iat podi andai prus ainnnantis puru, pighendi in cunsideratzioni e valutendi s’oportunidadi de avalorai unu “Ius Culturae”, aici cumenti at arragodau sa consillera Stefania Atzei, chi at serrau s’interventu suu cun d-una poesia stravanada de unu iscritori africanu apustis intregada, in d-una pergamena, a totus is pipius presentis.
Gùspini sempri atenta a is probbremas de s’integratzioni sociali e culturali, in cust’ocasioni puru est istétia pronta a cumprendi s’importàntzia chi unu gestu mancai simbòlicu podit tenni po is citadinus onoràrius nous, po sa comunidadi guspinesa e po totu sa natzioni.
