Logo della Provincia del Medio Campidano

Sardegna

Salta la barra di navigazione e vai ai contenuti

Vivere la campagna

Grandu fortuna in Biddacidru po sa manifestatzioni: “Su Connotu”

Grande successo a Villacidro per l'iniziativa battezzata “Su Connotu”

Tuesday, October 9, 2012 - REDAZIONE

 
Martis 9 de Meseladàmini de su 2012 - Redatzioni
Arriciu, pubbricaus: Grandu fortuna in Biddacidru po sa manifestatzioni: “Su Connotu”.
Fonti: “Associazione Progetto Comune”.

Sàbudu e e domigu 7 de Meseladàmini ddoi iat sa manifestatzioni organizada de sa “Associazione Progetto Comune” tzerriada “Su Connotu”, innói si est chistionau de amparai is biodiversidadis, de torrai a iscoberri is saboris antigus e de avalorai is connoscéntzias antigas. Sa tenta de ponni impari s’atentzioni asuba de is biodiversidadis de is prantas e de is animabis cun sa cultura chi at caraterizau su passau recenti de custas incontradas, est istétiu fatu cun sa cunvintzioni chi difendi sa particularidadi de sa cultura nostra e de su territóriu nostru siat sa mellus manera po cumbati su strecadura culturali, chi ndi benit de is processus de globalizatzioni.
Sa curiosidadi de is visitadoris me in s’acostai a totu su chi est istétiu ammostau, at agatau arraspustas prus o mancu craras me in is ispàtzius de is esponidoris, chi si funt impegnaus a ammostai, no scéti, is prodotus ma pruscatotu is procedimentus po ddus preparai. Su fai su pani, su trabballai sa linna, su connosci is ainas e su torrai a fai is gestus de dónnia dì acapiaus a unu mundu chi giràt aroru a sa messarítzia, su fabbricai is ainas impreadas dónnia dì e totu cussu chi domigu ant ammostau at rapresentau unu bagàgliu arricu e vàriu de connoscéntzias: Su Connotu. Acantu a custas ammostaduras, cuncuna fata cun s’agiudu de visitadoris, me in su “Caffè Letterario” ddoi iat un’ammosta asuba de is biodiversidadis de su logu, innói ddoi iat unus cantu centu variedadi de matas totu catalogadas de modu chi totus ddas podessint connosci o arragodai puru. Arragodai saboris, formas e caboris de fruta e birdura bolit nai no ndi perdi s’arragodu, poita medas bortas, po nexi de su tempus e de is mecanismus de mercau, chi s’imponint prodotus totus ugualis, anónimus e, su in prus de is bortas, chentza sabori, si ndi iscaresceus. Custa manifestatzioni, durada duas dìs, est cumentzada sàbudu cun su cunvegnu “La salvaguardia delle biodiversità, aspetti culturali e opportunità per la promozione dei territori rurali” me in s’auditóriu Santa Barbara. In su cursu de su cunvegnu organizau de “ Associazione Progetto Comune” impari cun “Laore”, si est sutalineau cumenti sa biodiversidadi, est a nai s’arrichesa e sa variedadi de is arratzas de is vegetalis (matas, erbas, ec.) e de is animabis, est necessària po sa vida nostra, poita cun sa ridutzioni (sméngua) de is variedadis de is arratzas s’arredusint is potentzialidadis produtivas de alimentus e matérias primas, si cumpromitit sa calidadi de s’ambienti e de sa vida nostra. Puru sa cultura, is traditzionis de sa messarítzia e de sa pastoria, su papai típicu de territórius diferentis si depint cunsiderai biodiversidadis, chi rapresentat unu patrimóniu po sa subravivéntzia de s’identidadi de is populatzionis”.
S’acontéssiu sinnat puru sa nàscita uficiali de su “Comitato per le biodiversità” de Biddacidru, chi trabballat in manera autónoma, po amparai is biodiversidadis. Chinisisiat podit agiudai a custu comitau, informendi de sa preséntzia de arratzas vegetalis de interessu locali, o promovendindi sa prantadura e sa spaniadura, a cumentzai de sa famíglia ma chentza de trascurai chi s’avaloramentu de arratzas localis podit essi una spinta, po fai partiri produtzionis de arratzas acapiadas a su territóriu nostru. Un’arringratziamentu andat a s’Aministratzioni Comunali, po sa cuncessioni de is spàtzius e a sa Pro Loco po ai agiudau a apariciai sa manifestatzioni.