Salta la barra di navigazione e vai ai contenuti
Vivere la campagna
Sa tessidúra est s’arti prus antíga praticàda de is fémmias sardas. Is prodútus, a parti su scopu praticu, serbíant po fai bella sa dòmu. Su tapétu est su prodútu prus pretziàu de s’artesanía sarda, chi non serbíat scéti po stèrri in terra ma po cobèrri puru sa mesa e sa cascia. Intra de su tessiu agatàus puru: cobèrtas, mantas, fànigas o burras, pannixéddus, aràtzus e arròbbas po arredaméntu. Is tramas de su connótu funt :a pibiònis, lisa e a punta de agu. Is decoradúras funt figúras geométricas, froris, animàbis e po fintzas símbolus aràldicus.
Sa matéria prima de is arròbas téssias est stetia sempri s’orbàci, chi est sa lana de is brabèis sardas.
S’aína de trabàllu fiat su telàju, chi podíat essi strantàxu o crocàu, cust’úrtimu fiat su prus impreàu in su Campidànu.
In dónnia dòmu ddoi fiat unu telàju, chi is giòvunas impreànt po tessi su corrèdu e totu su chi serbíat po sa domu, aici is ténnicas e is disínnus funt passàus de mama in filla, fintzas a lompi a nosu.
Oi s’arti de sa tessidúra usat aínas prus modérnas ma sighit ancoras is manèras antígas de su trabàllu, cumentzendi de su maníxu de sa lana fintzas a lompi a su trabàllu a su telàju.